KA NU LEH PA TE THU A NA ZUI SAM HI'LENG ZAW MAW????

Nuai simlei ah a piangkhia mihingte hong tuailai hun laitak ching un a lakah maban ding khualna in a lak uah kidemna/kitaitehna nasa mahmah hi. A khen te nu leh pa thugen zui in om   ua a khente lah mahni deih dan apai in a ut ut uh hih in khovel zang uhi. Huchi mahbang in keile ka nu leh pa thugen zuih san'g in keimah ut dandan in ka pai a nu leh pa zahtakna himhim le ka nei nonkei hi. Himahleh, a nung in kei ading haksatna, midangte enna leh mi dangte phazou lou kisakna in Hon pumtuam hi ka zi masa leh ka na it khak mahmah a nu leh pa'n hon zekhem a hon suhkik sak ziak un kingaisiatna hong lian mahmah in ka laizilna lam le awlmoh nonlou in khamtheih chi tuamtuam hih in ka hinkhua kazang ta hi. A ziak tuh hon kaihkhen kia ua hunsak hile uh poi kasa kei ka ta a pai uh a sukkiak hilhial uh ka lungkim theilou kingaihsiatna khovel ah hon pilut in nung leh ma khuallou adiak a ka maban ding khuallou in khamtheih hih in ka omna peuh ah ka buai hi. 

I laizil pih I lawm leh vual khenkhat in government ah sepna hoih taktak mu in nuamsatak in om ua kei bel midangte eng leh kisik in ka hun ka lang liam zel mai hi. Ka nu leh pa thugente ka na zuihlouh poi petmah hi. Ka na nu leh pa thugen na zui hilen'g tuni a kuamah englou leh midangte nuai a kunkun lou a om ding hi ing a maw poi petmah himai. Mite enghou, mite kou siat gawp a om samlou ding hi ing a poi taktak ahi. Office kai a khutzung a sum loh ziahziah ding hisam hi ing a, ka tuailai tung apan ka na thumang louh a ka ut dandan a ka omna in tua ka dinmun hon tun himaimah hia kisikhuai petmah. Hiai Namkal Buaina hong omkhak zenzen le kei adia vangtahna khat hi. Huai ah gam leh nam ka itluat ziak in ka hunteng ka na pekha laizang a eive midangte'n lai a sim lai un poi tak ahi. 

Khovel a damsawt ding zaw kei din gentheihna lel hi. Nu aw, Pa aw hon ngaidam un aw na thugente uh ka na zuihlouh ziak in tu in mi phalou in ka om maimah ta hi. Na thugente uh zui a thumang tak a om hileng tuni a nouleng nuamsa tak a hon koih ding ing a kenle nuamsa law ding hi ing a maw? Hon ngaidam un aw.